T’ABBITUA’

Faccio festa  ’a fatica
e  ’mmiezz’  ’a via,
faccio fatic’ a cammenà;

’a gente corr’e m’ fà viento,
e mmiezz’a tanta gente
faccio fatic’a penzà

m’ piglia ’o suonno
e  ’a vessica,
faccio fatica pur’a piscià.

Che faccio, me ne torn’a casa?
no, mò m’assetto ’ncopp’a  ’na  panchina
e m’ legg’ ’o giurnale ’e  ’sta mmatina.

M’è venuto ’nu sternuto,
forze sarà stat’ ’a paggina
d’o giurnale c’aggi’araputo;

m’è vvenuto ’na voglia ’e cafè;
m’ ’o piglio ’nu poc’arzente?
o  forz’è meglio doce,   

s’avesse movere ’a panza
no,  meglio ca no.
Che faccio me  ne torn’a casa?

no, ’o tiempo ’nce stà e na cosa
aggia pure fà;  m’ so’ allicurdato cà
nu par’ ’e scarpe m’aggi’accattà,

ma po’  m’ ll’aggia mmesurà,
m’aggia scegliere  ’o culore,
liev’e mmiette, t’acala, t’aiza,
 
avessa surà, m’avessa stancà
no, è meglio ca no.
Che faccio, me ne torn’a casa?

m’ sò arrubbato ’nu poco ’e libertà,
e na cos’aggia capito,
ca pur’a nun faticà, t’’e abbituà. 

11.02.2014